काठमाडौं महानगरपालिका–१८ नरदेवीबाट प्रहरीले भन्सार छलेर ल्याएको छालाको पेटी र पर्स बरामद गरेको छ । भन्सार छलीमा संलग्न सप्तरीको राजविराज घर भएका ४२ वर्षीय गणेश भगतलाई पक्राउ गरिएको उपत्यका अपराध अनुसन्धान कार्यालयका एसपी कृष्ण कोइरालाले बताए ।
अपराध अनुसन्धान कार्यालयको टोलीले उनको गोदाममा छापा मारेर १९ सय ६ थान छालाको पेटी र ५२ सय ९४ थान पर्स बरामद गरेको छ । आरोपीलाई कानुनी कारवाहीका लागि त्रिभुवन अन्तर्राष्ट्रिय विमानस्थल भन्सार कार्यालयमा पठाइएको एसपी कोइरालाले जानकारी दिए ।
