मकवानपुरको बागमती गाउँपालिका-५ सिक्रे दोभानमा आज बिहान गएको पहिरोले घर बगाउँदा एक जनाको मृत्यु भएको छ भने ६ जना पहिरोमा परि बेपत्ता छन् । सोमबारबाट परेको अविरल बर्षाको कारण मंगलबार बिहान ४ बजे बागमती गाउँपालिका-५ सिक्रे दोभान स्थित अक्कल बहादुर स्यांतानको घर पहिरोले बगाएको हो ।
पहिरोमा परी घाइते भएकी अक्कल बहादुरको श्रीमती ५५ वर्षीय सन्तमाया स्यांतानलाई स्थानीयले उद्दार गरी स्थानीय मेडिकलमा लगेकोमा उपचारको क्रममा उनको बिहान साँढे ८ बजे मृत्यु भएको जिल्ला प्रहरी कार्यालय मकवानपुरले जनाएको छ ।
उक्त पहिरोमा परि बागमती गा.पा. -५ सिक्रे दोभान बस्ने ६० वर्षीया अक्कल बहादुर स्यांतान उनकी २२ बर्षकी छोरी शिला पहरी,२५ वर्षीय ज्वाँई जीवन पहरी, जीवनका ४ वर्षीय छोरा मिलन पहरी र डेढ वर्षीया छोरी दिब्या पहरी बेपत्ता भएका छन् ।
साथै अक्कलको घरमा पाहुना लाग्न गएका सिन्धुली जिल्ला हरिहरपुर गाउँपालिका १ कोकटी बस्ने अन्दाजी १७ वर्षीय पासाङ घिसिङ पनि बेपत्ता भएको भोर्लेनी प्रहरी चौकी मकवानपुरले जनाएको छ । बेपत्ता भएकाको खोजी कार्य जारी रहेको प्रहरीले जानकारी गराएको छ ।
