राष्ट्रिय सूचना आयोगका प्रमुख सूचना आयुक्त महेन्द्रमान गुरुङले सूचनाको हक नेपाली नागरिकलाई प्राप्त सबैभन्दा बलियो अधिकार भएको बताउनुभएको छ ।
मध्यपुरथिमि नगरपालिकाको आर्थिक सहयोगमा सामुदायिक सारथीले आज यहाँ आयोजना गरेको ‘सूचनाको हक र सार्वजनिक निकायको भूमिका’ विषयक कार्यशालामा उहाँले संविधानले नागरिकलाई शक्तिशाली बनाएको बताउनुभयो ।
देशका सबै सार्वजनिक निकायले पारदर्शीता, जबाफदेहिता, इमानदारिता हुँदै भ्रष्टाचार नियन्त्रण गर्ने र सूचना व्यवस्थितरुपमा सार्वजनिक गर्दै जानुपर्ने बताउनुभयो ।
विश्वमा एक सय ३५ राष्ट्रमा सूचनाको हकसम्बन्धी कानुन रहेको चर्चा गर्दै प्रमुख आयुक्त गुरुङले यो मानव अधिकारका रुपमा स्थापित बनेको बताउनुभयो । सबै नागरिककोमा अधिकांश सूचना पुर्याउनै नसकिएको चर्चा गर्दै उहाँले भन्नुभयो, “आयोगमा नौ हजारभन्दा बढी पुनरावेदन परेको छ, अहिलेसम्म ३३ जनालाई कारबाही गरिसक्यौँ । सकेसम्म आयोगले कसैलाई सूचना नदिएकै आधारमा कारबाही गर्न नपरोस् भन्ने हो, त्यसका लागि कानुनले देऊ भनेका सूचना सहजरुपमा दिनुस् ।”
नगरपालिकाले कार्यालयको सबै निर्णयको अभिलेखीकरण राख्ने, दैनिक आफ्नो वेबसाइटमा सार्वजनिक गर्ने, तीन तीन महिनामा सबै सूचना सार्वजनिक गर्ने गरेमा सूचना माग्न आउनेको पनि कमी हुने उहाँको भनाइ थियो ।
कार्यक्रममा फ्रिडम फोरमका अध्यक्ष एवं वरिष्ठ पत्रकार तारानाथ दाहालले लामो समयको आन्दोलनपछि आएको सूचनाको हकसम्बन्धी कानुनको सबैले प्रयोग गर्नुपर्ने औँल्याउनुभयो ।
सूचनाको हक आफैँमा स्थानीय तहदेखि सबै सार्वजनिक निकायलाई अनुगमन गर्ने कार्य पनि हो भन्दै उहाँले यसले प्रत्येक नागरिकलाई प्रश्न सोध्ने अधिकार रहेको बताउनुभयो ।
कार्यक्रममा सामुदायिक सारथीका प्रमुख ताराबहादुर भण्डारीले सूचनाको हक कार्यान्वयन र यसको आवश्यकतासम्बन्धी कार्यपत्र प्रस्तुत गर्दै विश्वमा रहेको यसको अभ्यास र नेपालमा सूचनाको हकको प्रयोगका बारेमा जानकारी गराउनुभएको थियो ।
कार्यक्रममा मध्यपुरथिमि नगरपालिकाका प्रमुख प्रशासकीय अधिकृत विजयराज सुवेदी, नगरपालिकाका महाशाखा प्रमुख एवं सूचना अधिकारी केशव सिलवाललगायतले सूचनाको हकको कार्यान्वयनले सार्वजनिक निकायको पनि जिम्मेवारी बढेको बताउनुभयो ।
मध्यमुर थिमी नगरपालिकाको सहयाेगमा सामुदायिक सारथीकाे आयाेजनामा सूचनाकाे हक र सार्वजनिक निकायकाे भुमिका बिषयक एक दिने कार्यशाला गाेष्ठी भएको हो । राष्ट्रिय सूचना आयाेगका प्रमुख सूचना आयुक्त महेन्द्र मान गुरूड, वरिष्ठ पत्रकार तारानाथ दाहाल, सामुदायिक सारथीका तारा बहादुर भण्डारी, नगरपालिकाका प्रमुख प्रशासकिय अधिकृत बिजय सुबेदीले उत्कृस्ट भनाइ राख्नुभएकाे कार्यक्रममा नगरपालिकाका वडाध्यक्षहरू, जनप्रतिनिधीहरू, सूचना अधिकारी, कर्मचारीहरू र संचारकर्मीहरूकाे सहभागिता रहेकाे थियाे ।
