प्रहरीले स्रोत नखुलेको रु १३ लाख ६० हजारसहित एक व्यक्तिलाई पक्राउ गरेको छ। पक्राउ पर्नेमा झापा गाउँपालिका– १ निवासी ५४ वर्षीय तेजबहादुर गणेश छन्। विशेष सूचनाका आधारमा उनलाई इलाका प्रहरी कार्यालय (कुमरखोद) को प्रहरी टोलीले नेपाल–भारत सीमास्थित लसुना बोर्डरबाट शुक्रबार पक्राउ गरेको जिल्ला प्रहरी कार्यालय (झापा) ले जनाएको छ।
नगद लिएर भारतबाट नेपाल आइरहेका गणेश प्रहरीको टोली देखेपछि नजिकै रहेको घरतिर भागेका थिए। गणेशलाई घर नजिकैबाट रकमसहित पक्राउ गरिएको प्रहरीले जनाएको छ।
पक्राउ परेका गणेशका साथबाट एक हजार दरका नौ सय नोट, पाँच सय रुपैयाँका नोट आठ सय र एक सय दरका नोट छ सय बरामद भएको बताइएको छ। पक्राउ परेका गणेशलाई राजस्व अनुसन्धान कार्यालय (इटहरी) पठाउने तयारी भइरहेको जिल्ला प्रहरी कार्यालय (झापा) ले जनाएको छ।
