पत्रकार दिनेश सिटौलाको शव पोष्टमर्टमका लागि टिचिङ अस्पताल लैजाने तयारी

पत्रकार दिनेश सिटौलाको शव पोष्टमर्टमका लागि महारागन्जस्थित त्रिवि शिक्षण अस्पताल लैजाने तयारी गरिएको छ।

आइतबार मध्याह्न १२:४५ बजे निधन भएका सिटौलाको पोष्टमर्टम गर्ने तयारी भएको जिल्ला प्रहरी परिसर काठमाडौंका डिएसपी कौशल बुढाथोकीले जानकारी दिए।

‘अप्राकृतिक मृत्युहरूमा भोलिका दिनमा प्रश्न उठ्न सक्छन्। भोलि विवाद उत्पन्न हुन सक्छन्। अहिले सबैले सहमति जनाए पनि भोलि कसैले हल्लाकै भरमा जाहेरी दिइयो भने हामीसँग पोष्टमर्टम रिपोर्ट भएन भने हामी केही गर्न सक्दैनौं,’ उनले भने, ‘पोस्टमर्टम किन गरिएन भनेर पनि प्रश्न उठ्छ, त्यसैले पोस्टमर्टम गर्न लागिएको छ।’

सिटौलाको आइतबार निधन भएको ग्राण्डी अस्पतालले प्रेस विज्ञप्तिमार्फत जानकारी दिएको थियो।

‘चिकित्सकीय प्रोटोकलअनुसार मस्तिष्कको कार्य क्षमता परिक्षण गर्न एप्निय परीक्षण गरियो जुन पोजिटिभ थियो। जसले स्वतः श्रासप्रश्वास नभएको जनाउँछ। र उहाँको १२:४५ बजे निधन भएको जानकारी गराउँछौं,’ विज्ञप्तिमा भनिएको छ।

राष्ट्रिय स्वतन्त्र पार्टीका वरिष्ठ नेता बालेन शाहसँगै सुदूरपश्चिमको भ्रमणमा रहेका दिनेश सिटौला अछाममा बेहोस भएका थिए। उनी माघ १६ गते बिहान पौने १० बजे एकाएक लडेका थिए।

प्रारम्भिक उपचारका लागि अछाम अस्पताल पुर्‍याउँदा उनको स्वासप्रश्वास गइसकको थियो। पछि उनलाई कार्डियोपल्मोनरी रेससिटेशन (सिपिआर) गरी ४५ मिनेटपछि मुटुको चाल फर्किएको ग्राण्डी अस्पतालले जनाएको छ।

उनलाई नेपाली सेनाको हेलिकप्टरमार्फत काठमाडौं स्थित ग्राण्डी अस्पताल ल्याइएको थियो। ग्राण्डी अस्पतालले उनमा गम्भीर हेमोरेज भएकाले क्रिटिकल र न्यूरो सर्जरी टिमले आइसियूमा भर्ना गरेको थियो।

४८ घण्टासम्म अनुगमन गर्दा न्यूरोलोजिकल अवस्थामा कुनै सुधार नदेखिएको र मस्तिष्कको कार्यक्षमता पुन:प्राप्तिमा कुनै संकेत नदेखिएको पनि अस्पतालले जनाएको छ। उनी चलचित्र पत्रकार संघका निवर्तमान अध्यक्षसमेत हुन्।